ISO 9001:2008

ISO 9001: 2008 የጥራት ሥራ አመራር የምስክር ወረቀት- የቀጣይ ስኬት ስንቅ

ISO2የሰነዶች ማረጋገጫና ምዝገባ ፅህፈት ቤት እያሳየ ያለው ጠንካራ የአገልግሎት አሰጣጥ ከጊዜ ወደ ጊዜ እ እየጎለበተ ይገኛል፡፡ ይህ የፅህፈት ቤቱ ጠንካራ የሥራ ባህልም ከሕብረተሰቡና ከመንግስት እየተገኘ ላለው ሰፊ ዕውቅናና አመኔታ መሠረት ነው፡፡

የፅህፈት ቤቱ የበላይ አመራር፣ ሌሎች የማኔጅመንት አካላትና መላው ሠራተኞች እያደረጉ ያሉት የተቀናጀ ጥረት በአንድ ጊዜ ታይቶ ለማይደበዝዝና ቀጣይነት ላለው የገፅታ ግንባታ ተግባር እየተጫወተ ያለው ሚና ከፍተኛ ነው፡፡ ይህም በአገር አቀፍ ደራጃ የሚገኙም ሆኑ ዓለም አቀፋዊ ይዘት ያላቸው የአገልግሎት ጥራትና ጥንካሬ አረጋጋጭ ተቋማትም ጭምር እያረጋገጡት ያሉት ዕውነታ ነው፡፡ ለምሳሌ ፅህፈት ቤቱ የ2001 ዓ.ም የኢትዮጵያ የጥራት ሽልማት ድርጅት ተሸላሚ ከመሆኑም ባሻገር በተለያዩ ጊዜያት ያገኛቸው የዋንጫና ሌሎች የምስክር ወረቀት ሽልማቶች ለአገልግሎት ሰጪነቱ ስኬታማነት ተጨባጭ ማረጋገጫዎች ናቸው፡፡ ይሁንና፣ ተቋሙ እነዚህን ስኬቶች እንደመጨረሻ ግብ ይዞ አልተቀመጠም፡፡ ይልቁንም እነዚህን ገንቢና አበረታች ውጤቶች እንደ ተጨማሪ ስኬት ማሳያ መንገዶች በመጠቀም ለበለጠ የሥራ ተነሳሽነት ተጠቅሞባቸዋል፡፡

ISO3በላቀ የራስ መተማመን ስሜት የተጠነሰሰው የ ISO 9001:2008 የጥራት ሥራ አመራር ሥርዓት የምስክር ወረቀትን የማግኘትና ይበልጥ ለዓለማቀፋዊ ዕውቅና የሚያበቃውን ህልም የማሳካት ጠንካራ እንቅስቃሴዎች ለፅህፈት ቤቱ ጥንካሬ ጎልቶ መውጣት የበለጠ አስተዋፅኦ ያበረከቱ ናቸው፡፡ ይህንን ዓለማቀፋዊ የጥራት የምስክር ወረቀት ለማግኘት ለሁለት ዓመታት ያህል በጥንቃቄና በጥራት ሲከናወኑ የነበሩት ተግባራት የፅህፈት ቤቱን የጠራና ቁርጠኝነት የተሞላበት አሠራር ያስመሰከሩ ሆነው በድል ተጠናቀዋል፡፡ ዓለም አቀፋዊ የሆነውን ይህንን የጥራት ሥራ አመራር የምስክር ወረቀት ለማግኘት እ.ኤ.አ ከመስከረም 2011 ዓ.ም ጀምሮ በርካታ የጊዜ፣ የቁሳቁስ፣ የፋይናንስ፣ የሰው ሃይልና የሌሎች ተዛማጅ ነገሮች መስዋዕትነቶች ተከፍለዋል፡፡ በእነዚህ መስዋዕትነቶች የተከናወኑት እያንዳንዳቸው የአፈፃፀም ደረጃዎች ጥንካሬን ያሳዩ በመሆናቸውም ፅህፈት ቤቱ ዓለም አቀፍ የሆነው የ ISO 9001:2008 የጥራት ሥራ አመራር ሥርዓት የምስክር ወረቀት ባለቤት ለመሆን በቅቷል፡፡

በአገልግሎት ሰጪ ተቋማት አሠራር ውስጥ ብዙም ያልተለመደው የዚህ ስኬት መገኘት፣ ለሀገር እንደ አጠቃላይ፣ ለፅህፈት ቤቱ እንደተቋምና ለበላይ አመራሩ፣ ለማኔጅመንቱና ለመላው ሠራተኞች ደግሞ እንደ ህብረተሰብ አገልጋይ አካል ትልቅ ኩራት ነው፡፡ በመሆኑም ሁላችንም እንኳን ደስ አለን!!

 

 

Posted in ዜና.